សេចក្ដីផ្ដើម អាណាចក្រសង្គ្រាម

រឿង អាណាចក្រសង្គ្រាម

 សេចក្ដីផ្ដើម

      

     តាមដំណើររឿងកាលពីបុរាណមក (សតវត្សទី ១ ដល់ ១៣) ទឹកដីអាណាចក្រកម្ពុជា មានទំហំ ធំទូលំទូលាយណាស់ ដែល មានព្រំដែនគោក ខាងជើងទល់នឹងប្រទេសចិន ខាងលិចទល់នឹង ប្រទេសភូមា ខាងត្បូងទល់នឹងចក្រភពម៉ាឡាយូនិងសមុទ្រ ខាងកើតទល់នឹងសមុទ្រចិន និងប្រទេសចម្ប៉ា ។

     ក្នុងប្រវត្តិដ៏សម្បូរបែបយ៉ាងនេះ កវីនិពន្ធតាមបែបនឹកឃើញ សូមកាត់យករឿងប្រវត្តិសាស្ដ្រ មួយកំណាត់ខ្លី នៃមួយផ្នែកនៃ ភាពរុងរឿងដ៏អស្ចារ្យរបស់អាណាចក្រកម្ពុជា មកនិទានជា សាច់រឿង តាមបែបប្រវត្តិសាស្ដ្រ មានលាយឡំនឹងឈុតឆាក កាប់ចាក់ប្រើដាវ លំពែង កាំបិត បង្កជាសង្គ្រាម មានឈុតស្នេហា ស្មោះស្មគ្រ មានឈុតសោកនាដ្យកម្ម ដ៏ខ្លោចផ្សារដែលបាន បន្សល់ ពីការធ្វើសង្រ្គាម ។ 

     ក្នុងនោះ ក៏មានបង្ហាញពីក្បាច់គុនខ្មែរ ដែលមានភាព ល្បីល្បាញ បង្ហាញពីយុទ្ធសាស្ដ្រសង្គ្រាមដែលខ្មែរបានបង្ក្រាប ជនជាតិ និងជាតិសាសន៍ដទៃ ដែលប៉ុនប៉ងឈ្លានពានដណ្ដើម យកទឹកដីអាណាចក្រកម្ពុជា ។

     ខ្ញុំបាទក៏សូមអធ្យាស្រ័យផងដែរ​ រាល់កំហុសខុសឆ្គង ទាំងឡាយណាដែលកើតឡើង ទោះជាចេតនាក្ដី ឬអចេតនាក្ដី ព្រោះនេះគ្រាន់តែជារឿងមួយដែលបង្ហាញពីអតីតភាព​រាប់រយឆ្នាំមកហើយ ។

     សូមអញ្ជើញតាមដានទស្សនាកំសាន្ដលេង​ជាមួយនឹងខ្ញុំបាទ